කොළඹ වරායේ බටහිර කොටස විකුණා දැමීමට විරෝධය

ආර්ථිකය හා ආරක්ෂාව සැබැඳිව කොළඹ දකුණු වරායේ බටහිර පර්යන්තය ඔබ රජය යටතේ ඉන්දියාවේ අදානි සමාගමට විකුණා දැමීමට පසුගිය දා රහසිගතව කටයුතු කිරීම තරයේ හෙලා දකින අතර අපගේ දැඩි විරෝධය ඔබ රජයට පළකර සිටින බව සමස්ත ලංකා වරාය පොදුසේවක සමිතිය ජනාධිපතිවරයා වෙත කරුණු පැහැදිළි කරමින් ලිපියක් යොමු කර ඇත.

එම ලිපියේ වැඩිදුරටත් සඳහන් වන්නේ, ඉන්දියානු අදානි සමාගමට 51% ක්, ජෝන් කීල්ස් සමාගමට 34% ක් හා ශ්‍රී ලංකා වරාය අධිකාරියට 15% ක් වන පරිදි වසර 35ක කාලයක් සඳහා දකුණු කොළඹ වරායේ බටහිර කොටස විකුණා දමමින් ශ්‍රී ලංකා වරාය අධිකාරියත් බටහිර බහලු පර්යන්ත පුද්ගලික සමාගමත් අතර 2021.09.30 දින අත්සන් තබන ලද පවාදීමේ ගිවිසුම මගින් ජාතික ආර්ථිකය ගොඩනැගීමට තිබූ තවත් ජාතික සම්පතක් බහුජාතික සමාගමක් අතට පත් කිරීමට ඔබ රජය කටයුතු කර ඇත.

ශ්‍රී ලංකා වරාය අධිකාරියත් ඉන්දියානු අදානි සමාගම ඇතුළු පාර්ශවකරුවන් සමග අත්සන් තබන ලද මෙම ගිවිසුම, මහජනතාව, පාර්ලිමේන්තුව හා වෘත්තීය සමිති දැනුවත් නොකර රටට හොර රහසේ අත්සන් කිරීමට කටයුතු කිරීම මගින් පෙන්නුම් කරන්නේ රටට අහිතකර හා අවාසිදායක කොන්දේසි මෙම ගිවිසුම තුල අන්තර්ගතව ඇති බව නොවේද?

විශේෂයෙන් ඔබ රජය බලයට පත්වී මාස කිහිපයක් ඇතුලත නැගෙනහිර පර්යන්තයෙන් 49% ක කොටස් ප්‍රමාණයක් ඉන්දියාවේ අදානි සමාගම වෙත විකුණා දැමීමට උත්සහ ගත් අතර ඊට එල්ල වූ සියළු විරෝධයන් හමුවේ නැගෙනහිර වෙනුවට බටහිර කොටස අදානි ඇතුළු පාර්ශවකරුවන්ට ලබා දීමට කටයුතු කිරීම මගින් පෙන්නුම් කරන්නේ විකිණීම ඔබගේද ප්‍රතිපත්තිය බව නොවේද? ඔබ රජය නැගෙනහිර පර්යන්තයෙන් 49% ක කොටස් ප්‍රමාණයක් ඉන්දියාවට විකිණීමේදී ඉදිරිපත් කරන ලද ප්‍රදාන තර්කය බවට පත්වූයේ ඉන්දියාව පදනම් කරගනිමින් පවතින 66% ක ප්‍රති අපනයන බහළු වෙළඳපොල නැගෙනහිර පර්යන්තය ඉන්දියාවට ලබා නොදුන හොත් රටට අහිමි වන බවයි. එය සාවද්‍ය ප්‍රකාශයකි. ඉන්දියාව කොතරම් උත්සහ කලත් කොළඹ වරාය පදනම් කර ගෙන ක්‍රියාත්මක වන බහළු වෙළඳපොල ඉන්දියාව වෙත ඇද ගැනීමට  කිසිසේත් හැකියාවක් නැත. ඊට හේතුව ලංකාවේ පිහිටීම අනුව ජාත්‍යන්තර නාවික මාර්ගය ලංකාවට ආසන්නයෙන් පිහිටීමයි. එබැවින් එහි වාසිය ඉන්දියාවට ලබා ගත නොහැක. එවැනි පසුබිමක ඔබ රජයේ අධූරදර්ශී ක්‍රියා පිළිවෙත හේතුවෙන් ඉන්දියාව තුල ඉන්දියානු වරායකට අත්පත් කර ගත නොහැකිව තිබූ ප්‍රති අපනයන බහළු වෙළඳපොල දකුණු කොළඹ වරායේ බටහිර කොටස ඉන්දියානු අදානි සමාගමට විකිණීම මගින් සම්පූර්ණ කර දීමට ඔබ රජය කටයුතු කර ඇත. එය අප රට ආර්ථිකමය වශයෙන් ඉන්දියාවට පවා දීමකි.

උපනූපන් පරම්පරාවට හිමි විය යුතු ජාතික සම්පත් මේ ආකාරයට වගකීම් විරහිත ලෙස අවභාවිතා කිරීමට වසර 5 කට බලයට පත් වන රජයකට නෛතිකව හැකියාවක් නැත. විශේෂයෙන් ජාතික සම්පත් සුරකින බවටත් පසුගිය රජයන් යටතේ විකුණා දමන ලද සම්පත් නැවත පවරා ගන්නා බවටත් පොරොන්දු දී බලයට පත් ඔබ රජයට ජාතික සම්පත් විකිණීමට සාදාචාරත්මක අයිතියක්ද නොපවතී.

අප රට සංවර්ධනයේදී දේශීය හෝ විදේශීය ආයෝජන කැඳවීම අප පිලිගන්නා මුත් ඒවා කැඳවිය යුත්තේ ජාතික ආර්ථික සැලැස්මක කොටසක් ලෙස මිස විකුණන් කෑමේ ආර්ථික ප්‍රත්පත්තිය මත පිහිටා නොවේ. වසර 42 ක වරාය අධිකාරියේ ඉතිහාසය පිලිබඳව විධිමත් පසු විපරමක් ඔබ රජය සිදුකලා නම් නැගෙනහිර පර්යන්තය ඉන්දියානු අදානි සමාගමට විකුණාදැමීමට උත්සහ ගන්නේ හෝ බටහිර පර්යන්තය ඒ වෙනුවට ඉන්දියාවට විකුණා දැමීමට කටයුතු නොකරනු ඇත. එසේම චීනයේ CICT පර්යන්ත සමාගමට වරාය අනාගත සංවර්ධනයට අතිශයින් වැදගත් පිහිටීමක ස්ථානගතව පවත්නා අක්කර 13ක ඉඩම හා වරාය අධිකාරියට පමණක් හිමිව පවතින සේවා සැපයුම් කටයුතු විකිණීමට අදාලව කැබිනට් පත්‍රිකා අනුමත නොකරනු ඇත.

ප්‍රධාන නාවික මාර්ගයට සමීපව අපේ රට පිහිටීමේ වාසිය ඔබ රජය ඇතුළු කිසිදු රජයක් තම ආර්ථික උපාය මාර්ගයේ කොටසක් බවට පත් කර ගෙන නැත. එසේ වුවා නම් ජනතාකරණය, ප්‍රතිව්‍යුහගතකරණය, කොටස් පැවරීම, අයෝජනය වැනි විවිධ නාමකරණ යටතේ වරාය අධිකාරියට අයත් වරායවල්, පර්යන්ත, ව්‍යාපාර, සේවා හා වටිනා ඉඩම් බහුජාතික සමාගම් අතට පත් වන්නේ නැත.

ඔබ රජය බලයට පත් වීමේදී ජාතික ආරක්ෂාව පිළිබඳව  මහත් උනන්දුවෙන් ජනතාවට සහතික ලබා දුන්නද ඔබගේ ක්‍රියාකලාපය තුල ජාතික ආරක්ෂාව පිළිබඳ විෂයේ ගැඹුරු කියවීමක් ඇද්ද යන්න බරපතල ගැටළුවක්ද පවතී, විශේෂයෙන් ජාත්‍යන්තර භූ දේශපාලනය තුල ඉන්දියාව හා ඇමෙරිකාව එක් කඳවුරකත් චිනය තවත් කඳවුරකත් නියෝජනය කරනු ලබයි. එවන් පසුබිමක දකුණු කොළඹ වරායේ දකුණු කොටස චීනයේ CICT  සමාගමටත් බටහිර කොටස ඉන්දියාවටත් විකුණා දැමීමට කටයුතු කිරීම මගින් එකිනෙකට පස මිතුරු රාජ්‍යයන් දෙකක් එකම භූමියක හමුවීමට සැලැස්වීම අප වැනි කුඩා රාජ්‍යයක ආරක්ෂාව සබැඳිව එල්ල කරන බලපෑම සුළුවෙන් තක්සේරු කල නොහැක.

ගරු ජනාධිපතිතුමනි,

ආර්ථිකය හා ආරක්ෂාව සැබැඳිව කොළඹ දකුණු වරායේ බටහිර පර්යන්තය ඔබ රජය යටතේ ඉන්දියාවේ අදානි සමාගමට විකුණා දැමීමට පසුගිය දා රහසිගතව කටයුතු කිරීම වගකිව යුතු වෘත්තීය සමිතියක් ලෙස අප තරයේ හෙලා දකින අතර අපගේ දැඩි විරෝධය ඔබ රජයට පළකර සිටිමු. කොළඹ වරාය තුල තවදුරටත් ඉතිරිව පවතින සම්පත් හා සේවා පිළිබඳවත් ත්‍රිකුණාමලය, ගාල්ල ඇතුළු වරාය අධිකාරියට අයත් අනෙකුත් වරායන් වල ඉරණම පිළීබඳවත් බරපතල ගැටළුකාරී තත්වයක් මේ වන විට නිර්මාණය වී ඇත. අප ඔබ රජයෙන් ඉල්ලා සිටින්නේ උපනූපන් පරම්පාරාවේ අනාගතය උගසට නොතබන ලෙසත් ජාතික ආර්ථිකය ගොඩනැගීම සඳහා වරාය සතු සම්පත් බහුජාතික සමාගම් අතට පත් නොකර රජයක් ලෙස එහි වගකීම බාර ගන්නා ලෙසත් ජාතික ආරක්ෂාව පිළිබඳව තබා ගත යුතු බර තැබීම අත් නොහරින ලෙසටයි.

You might like

About the Author: Editor